ដោយ៖សិរីមតី
ភ្នំពេញ៖ពិព័រណ៍ការសិក្សានៅប្រទេសអូស្ត្រាលីនិងណូវែលហ្សេឡង់ដ៏ធំជាងគេត្រូវបានរៀបចំឡើងដោយស្ថាប័នIDP Education ក្រោមការគាំទ្រនិងចូលរួមបើកដោយលោកAndreas Zurbrugg ភារធារីស្ថានទូតអូស្ត្រាលីប្រចាំនៅកម្ពុជានិងលោកម៉ៅ ស្រេង នាយកប្រចាំប្រទេសនៃស្ថាប័ន IDP Education និងសាលា ACE នាព្រឹកចុងសប្តាហ៍ថ្ងៃទី ១៤ ខែកក្កដា ឆ្នាំ ២០២៤ នៅឯសណ្ឋាគារសូហ្វីតែលភ្នំពេញ។
សិស្ស និស្សិត និងអាណាព្យាបាលសរុបប្រមាណជាង ១២០០ នាក់បានជួបប្រឹក្សាផ្ទាល់ជាមួយអ្នកតំណាងនៃស្ថាប័នលំដាប់ពិភពលោកប្រមាណជាង ៥០ ស្ថាប័នមកពីប្រទេសអូស្ត្រាលី និងណូវែលហ្សេឡង់ដើម្បីស្វែងយល់លម្អិតនូវព័ត៌មានអំពីជម្រើសសិក្សា លក្ខខណ្ឌចូលរៀន ការដាក់ពាក្យ និងស្នើរសុំទិដ្ឋាការដើម្បីទៅសិក្សា ព្រមទាំងព័ត៌មានអាហារូបករណ៍នានាជាច្រើន នាពិព័រណ៍រយៈពេល ២ថ្ងៃនេះដែលធ្វើឡើងក្នុងថ្ងៃទី ១៣ និង ១៤ កក្កដា ឆ្នាំ ២០២៤ នៅសណ្ឋាគារសូហ្វីតែលអង្គរ និងភ្នំពេញ។
ក្រោមការឆ្លុះបញ្ចាំងលើឥទ្ធិពលនៃការអប់រំអន្តរជាតិ លោក ម៉ៅ ស្រេង នាយកប្រចាំប្រទេសនៃស្ថាប័ន IDP Education និងសាលា ACE បានបញ្ជាក់ថា៖ “ការអប់រំអន្តរជាតិផ្តល់ផលវិជ្ចមានគួរឲ្យកត់សម្គាល់សម្រាប់សិស្សានុសិស្សលើចំណេះដឹង និងជំនាញ ព្រមទាំងចក្ខុវិស័យដែលជម្រុញបន្ថែមដល់ការអភិវឌ្ឍន៍ និងបង្កើនសមត្ថភាពសម្រាប់ភាពជាអ្នកដឹកនាំ។”
លោកក៏បានបន្ថែមទៀតថា៖ “ពិព័រណ៍នេះគឺជាវេទិកាដ៏ទូលំទូលាយ និងស្វាគមន៍រាល់សិស្សានុសិស្ស និងអាណាព្យាបាលសំដៅយ៉ាងណាស្វែងយល់ ឬសាកសួរព័ត៌មានលម្អិតដើម្បីទទួលបានព័ត៌មានថ្មីៗ និងត្រឹមត្រូវពីអ្នកជំនាញដើម្បីសម្រេចបាននូវបំណងក្នុងការបន្តការសិក្សានៅស្ថាប័នដែលខ្លួនពេញចិត្តនៅក្នុងប្រទេសអូស្ត្រាលី និងណូវែលហ្សេឡង់។”
ពិព័រណ៍ក៏រួមមានការផ្តល់ជូនព័ត៌មានលម្អិតអំពីអាហារូករណ៍របស់រដ្ឋាភិបាលអូស្រ្តាលី និងណូវែលហ្សេឡង់តាមរយៈកម្មវិធី Australia Awards និង Manaaki New Zealand Scholarships។ បន្ថែមពីនេះ អ្នកចូលរួមក៏ទទួលបានឱកាសយល់ដឹងបន្ថែមពីវគ្គបណ្តុះបណ្តាលភាសាអង់គ្លេស ឬការធ្វើតេស្តដែលទទួលស្គាល់ជាសកល (IELTS) ពីអ្នកជំនាញប្រចាំមជ្ឈមណ្ឌល អូស្ត្រាលីសម្រាប់ការបណ្តុះបណ្តាល (សាលា ACE) និងអ្នកផ្តល់ជូនតេស្ត IELTS ផ្លូវការ (IDP IELTS) ផងដែរ។
សិស្ស និស្សិត និងអាណាព្យាបាលដែលចូលរួមក៏បានរីករាយជាមួយនឹងសកម្មភាពកំសាន្តបែបអប់រំនានាក្នុងពិព័រណ៍ដែលសាកសមលើគ្រប់កម្រិត និងវ័យរួមមាន ការឆ្លើយសំនួរងាយៗដើម្បីទទួលបានរង្វាន់ ការប្រកបពាក្យបែបឌីជីថល (កម្មវិធី CAMBee) ការចាប់កូនបាល់តាមម៉ាស៊ីនដើម្បីទទួលបានរង្វាន់ និងការថតវីឌីអូសែលហ្វី ៣៦០ ដឹក្រេវីដេអូក្រោមការសម្របសម្រួលពីក្រុមការងារ និងក្រុមស័្មគ្រចិត្តដោយផ្ទាល់។
បង្កើតឡើងដោយរដ្ឋាភិបាលអូស្រ្តាលីក្នុងឆ្នាំ ១៩៦៩ ស្ថាប័ន IDP មានការិយាល័យប្រមាណ ១៩០ កន្លែងលើបណ្តាប្រទេសជាង ៨០ និងបន្តការផ្តល់ជូនសេវាប្រឹក្សាយោបល់ទៅសិក្សានៅបរទេសឈានមុខគេលើពិភពលោក រួមមានប្រទេសអូស្រ្តាលី ណូវែលហ្សេឡង់ ចក្រភពអង់គ្លេស អៀរឡង់ សហរដ្ឋអាមេរិក និងកាណាដាជាដើម។ស្ថាប័ន IDP ក៏ឈានមុខគេលើការផ្តល់ជូនតេស្ត IELTS ដែលជាតេស្តវាយតម្លៃសមត្ថភាពភាសាអង់គ្លេស និងត្រូវបានទទួលស្គាល់ពីប្រមាណ ១១៥០០ ស្ថាប័នជុំវិញពិភពលោក។
សម្រាប់សិស្ស និស្សិត និងអាណាព្យាបាលដែលចង់ទទួលបានសេវាប្រឹក្សាយោបល់ទៅសិក្សានៅបរទេសដោយឥតគិតថ្លៃ និងមានជំនាញ សូមទំនាក់ទំនងមកកាន់ការិយាល័យ IDP ដែលមាននៅទីតាំងទាំង ៦ សាខានៃសាលា ACE ក្នុងរាជធានីភ្នំពេញ និងសៀមរាប ឬទំនាក់ទំនងមកកាន់ 023 902 600 ៕
